5/23/11

من جلجامش إلى الإمارة الاسلاميه

النا من أول ما بلشت الثورة و نحنا عم نسمع عن الامارات الاسلاميه يلي عم تطلع بسورية أسرع من البرسيم
يعني مدري كيف... بيروح الجيش على حمص أول شي ، بعد كم يوم مندرا إنو طلع عندن إمارة اسلاميه..
بيروح على درعا.. بعدين قناة الدنيا الجهبذه بتتذكر إنو نسيوا يخبرونا عن السلفيين يلي إكتشفوهم هنيك.. و هلم جر....

بس حلاوة الامارات الاسلاميه هالايام إنو بتطلع علهسي.. يعني عالساكت.. لا وبسايت ، لا تصريح أو توضيح عليوتيوب.. لك ولا حتى أسماء من تبع "أبو عتاقة بن حفلمظ الشمعري" .. يعني إمارة اسلاميه أنونيموس... المهم الفكرة..

طيب... خدوني على قد عقلي شوي..

هلأ كلنا متفقين إنو في الثورة و في المعارضة.. مو بالضرورة نفس الشي بس يعني يمكن في تقاطعات هون و هنيك، فإذاً عنا الإحتمالات التاليه:

فرضيه أ :
فإذا قلنا إنو الثورة يلي عم نشوفها و نسمع عنها كل يوم هيه اسلاميه سلفيه اصوليه وهابيه إلخ .. متل ما حبيبنا خالد عبود و جماعته عم يسموها... إذاً ما لح تشوف عالم يساريين عم يدافعوا عنها.. و بما انو المعارضة المعروفه بسورية أغلبها يساري 
فإذاً كل مقابلات برهان غليون وعارف دليلة و ميشيل كيلو و حسن عبد العظيم مزورة.. أو إنو عميد كلية الإقتصاد سابقاً بدمشق و أستاذ بالسوربون جدبان و ما انتبهوا إنو عم يدافعوا عن ثورة لح تهدر دمهن بعد ما تنجح...
إذاً فرضيه أ شكلها فاقسه....

فرضيه ب:
إذا كانت  المعارضة السورية يلي أكتر من  نصا كاين محبوس بلعشر سنين الماضيين قدرت باستخدام التواصل بإشارات مورس عبر القرع على جدران سجن صيدنايا إنو تحرك كل هلمظاهرات بس قررت إنو تكون أخلاقها عاليه و تتواضع و ما تقول نحنا يلي ساوينا الثورة، فإذاً نظرية الإمارات الاسلاميه شوي صارت فضائيه إذا كانت من تخطيط المعارضة اليساريه .. شنو ما عم اقدر اتخيل أبو عتاقة بن حفلمظ الشمعري مجتمع و عم يخطط مع سهير أتاسي
إذاً فرضيه ب شكلها فاقسه....

فرضيه ج :
طلع عنجد في مندسين بين صفوف الثوار .. و أنا أكيد إنو خالد العبود عم يرقص طرباً على هلنظريه.. 
و كان مع هل ثوار يلي بدون كرامتون و حقوقهم الطبيعيه في كم واحد أبو ذقن بدن يستغلوا الفرصة مشان إقامة إمارة اسلاميه
طيب، كان هل الاف من المتظاهرين يلي عم يقولوا "سلميه سلميه" و "الشعب السوري واحد" بأعلى صوتن لح يقبلوا تكون بينون عالم عم تدعي لايديولوجية قمعيه من نوع تاني، و يكون بدها إبادة كل الأقليات و ألإتجاهات الفكريه المخالفه؟ 
ولا كانوا هدول المندسين علمندسين لح يستحوا يحملوا شعارات دينيه، بس بالصدفه ما طلعت على ولا فيديو ولا حدا سمع عنها ولا بعمرا انعرضت عالفضائيات؟
إذاً فرضيه ج، برأي الشخصي، شكلها فاقسه....

طيب.. ليش لكن مالنا مستعدين نصدق إنو شعب في مليون طائفه و ستين مذهب سياسي و خمسميت قوميه و تلاتميت عرق مالون قدرنين يطالبوا بحل بالوسط : ديمقراطي تعددي جمهوري بحقق رغبات الكل
يعني يا للأبد يا بشار الأسد يا بالروح بالدم نفديك يا  أبو عتاقة بن حفلمظ الشمعري ؟
شو مفكرينا لهلدرجه شاطه ريالتنا؟




* تم نشرها أيضا في مدونة المندسة http://www.the-syrian.com
* تم نشرها أيضا في مدونة الجمرة السورية http://aljamra.blogspot.com


No comments:

Post a Comment