رسالة إلى مؤتمر انطاليا للمعارضة السورية

بعرف إنو معضلة معارضة الخارج و حق التكلم بلسان الشارع السوري قضيه ما لح تنحل بسهوله.. و شو ما حكيتو في حدا لح يطلع مانو مبسوط.. ماشي الحال .. اللا ما يطلع شي حدا مبسوط بالأخير..

و بعرف إنو هي أول مرة المعارضة اليساريه لح تقعد مع الأحزاب الدينيه بتمويل من التجار المحليين، و لح تستكشفو كلكن إنو هاد الشي ضد مبادئكم العظيمه و إتجاهاتكم السياسيه.. معلش.. ازرعوها بدقننا.. وزعوا خبز أو نبيذ أو أكلة حبوب بعد المؤتمر مشان تنامو مرتاحين

و بعرف إنو بعتولكم شبيحة يضربوكم حتى بانطاليا.. علأقل صار فيكون تقولو انكن حاسين بمعاناة الشعب السوري عن جد... و الشاطر يقول لأ!!!

بس مشان هلشوارب .. مشان خاطري .. مشان الملائكه... مشان العفاريت..

بس حبو بعضكم هل كم يوم و حسسو هالمعترين بالشوارع انكن مستعدين تقدموا تضحيات.. على مستوى إنو ما تتخانقوا من قبل المؤتمر ما يبلش حتى، و طلعوا ببيان موحد و خطة عمل  حقيقيه..

و تذكروا إنو معارضة الداخل و الخارج هي مفاهيم جغرافيه ما عاد إلها طعمه مع كل هالتكنلوجيا يلي صارت ببيت الكل.. المهم النتيجه

و مشان الله بلا صف الحكي و البيانات الثوريه و الندب و الشجب و التنديد و الإحتفاظ بحق الرد و الصمود والتصدي..

كلمتين و رد غطاهم.. إذا بدكم تحكوا بإسم الشعب، حكوا بلغة الشعب.. و حكو  بمنطق الشعب..

بعدين رجعوا عبيوتكم و كتبوا مقالات و أشعار و بيانات قد ما بدكم.. 

لأنو إذا تويتر بلش الثورة بمصر بأقل من ١٤٠ حرف .. انتو مالكون أحسن

و الخلود لرسالتنا..

* تم نشرها أيضا في مدونة الجمرة السورية http://aljamra.blogspot.com