و علاش؟

إنو يمكن بعد شي ٣ سفن أب اهضم فكرة الدكتاتورية الفرديه.. بالأخير في ايجو أو إعجاب بالذات.. و كمان في مصاري،  و طبعاً في منافع متل النسوان و السيارات ..

و يمكن بعد شي ٣  مندرين بعدن إستوعب قصة العيله الحاكمه.. بالأخير ابسط يلي حواليك بتضمن مستقبلك

و يمكن مع حبة اينو و مالوكس إستوعب التبرير الذاتي تبع واحد متل حمشو واللا الكزبري يلي هنن وجوه برانيه لماهر و أصف و رامي و إلخ.. يعني لو حدا قلك خود مصاري متل الهبل و ماتعمل شي مقابل انك تكون واجهة.. إيه ليش لأ؟

بس يلي ما عم إفهمو هنن ناس متل هدول الأغبيا بسام أبو طالب و خالد عبود و طالب ابراهيم

يعني يا حرام شو بيطلعو و بيعصبو و بينحمقو على هلتلفزيون .. و مشان شو؟ و علاش؟

فكرون إنو لح يتزكرولن هلموقف؟

بكرة إذا صار ما صار جماعة فوق لح تكبهم لما ما يعودوا بعازتهم، و المثال سميرة مسالمه

و جماعة تحت - يعني نحنا - بدنا نلعن نفسهم

يا أخي والله الواحد بهيك ايام لازم يحسب لبعيد.. مو؟

* تم نشرها أيضا في مدونة المندسة http://www.the-syrian.com*
* تم نشرها أيضا في مدونة الجمرة السورية http://aljamra.blogspot.com